تصوروا

تصوروا يا جماعة ان الحكومة الرشيدة ذات الصفات الحميدة و بعد التجربة الملموسة النجاحات قررت انزال العملة المعدنية فئة العشرة جنيهات و الخمسة جنيهات للتعامل بين المواطنين
و كل واحد يجهز سرة علشان يشيل فيها الفلوس يوم القبض بس المفروض ان سرة الفلوس تبقى على حساب الحكومة
و زرغدى ياللى مانتيش غرمانه

و انا راجع من شغلى النهاردة

اقتباسا من اسم البرنامج الكوميدى ( انا جاى الناردة ) مع احترامى الشديد

اليوم الساعة 12 منتصف اليل اثناء عودتى من عملى بالاسكندرية و مشكلة كل يوم مع سائقى الميكروباص ( الاجرة جنيه و ربع يا افندية ) خلاص بقت اجبارى بعد الساعة 12 الاجرة جنيه و ربع بدل جنيه ( و هى الاجرة الرسمية و المحددة من قبل الحكومة لسيارات الميكروباص الاجرة من موقف العوايد بالاسكندرية الى موقف كفر الدوار ) البعض من الركاب تزمر و البعض الاخر - اللى زييى - ماشى يا اسطى اتوكل على الله ما اهو احنا بنركب كل يوم و ياما اتخانقنا و ياما نزلنا من الميكروباص بعد ما حمل و ياما رجع السواق من نص السكة بعد ما اعترضنا على الزيادة الجبرية المهم ان السواقين كلهم متحدين علينا احنا الركاب .

مش هى دى المشكلة بصراحة ده موضوع كبير جدا نخلى الكلام فيه لوقت تانى .

المهم المشكلة انى دفعت الاجرة جنيه معدن الحكومة هى اللى سكاه مش انا والله و ربع جنيه ورق الحوار دار كالتالى:

السواق : اللى دفع الجنى ده يا افنديه يغيره بواحد تانى

انا : ماله يا اسطى الجنيه ؟ مقطوع ولا قديم

السواق : لا يا افندى ده جنيه فضيه و الجنى ده مبيمشيش معانا .

- ليه يا عم مبيمشيش ليه بس ماهو زى الفل اهه و الحكومة هى اللى عملاه

- محدش من الركاب بيرضى ياخده يا استاذ

رد واحد تانى : التجار و البياعين مبرذوش يتعاملوا بيه

واحد تالت : دول حينزلوا خمسه جنيه فضه

واحد رابع : هاتوا يا اسطى ولا تزعل نفسك انا حاخده

انا : لا يا اسطى اللى ميرضاش ياخده اعمله محضر زى الحكومة ما بتقول عدم تعامل بالعمله المحليه

السواق : و النبى يا استاذ انا من يومين دخلت الكمين علشان راكب ادانى عشرين جنيه و رجعتله الباقى 18 جنيه و معاهم جنيه واحد معدن مرضيش ياخده و دخلت للظابط قالى اديه ل واحد تانى قلت له - الكلام للسواق - ماحدش راضى ياخده قال لى خلاص خليه معاك قول لى بقى يا استاذ انا اعمل ايه و النبى انا مش عايز وجع دماغ و هات غيره

المهم ماطولش عليكم اخذت الجنيه المعدن تانى و اديته واحد ورق علشان وجع الدماغ و نويت احوش الجنيهات المعدن دى جنيه على جنيه لغاية ما ربنا يسهلها و اقدر اشترى عربية ترحمنى من بهدلة المواصلات و تحكم السواقين بينا

و ربنا يكرم

انا كنت نسيت

تخيلوا انى كنت نسيت ان ليا مدونة عنوانها محاولة تدوين
بدل ما احاول ادون نسيت التدوين
عموما اوعدكم من هنا و اريح راح ادون و ادون و ادون و املا الدنيا تدوين
سلام لغاية ما الاقى حاجة ادونها
بس بجد فى حاجات كتير عايزة تخرج ولازم تطلع و تظهر